مسلم لیگ (ن) گوجرانوالہ کے رہنما کاشف اسماعیل گجر کا انٹرویو

ورلڈ پوائنٹ کے پروگرام دیس پردیس میں مسلم لیگ نون ضلع گوجرانوالہ کے نائب صدر کاشف اسماعیل گجر کا خصوصی انٹرویو، میزبان شاہد گھمن۔ کاشف اسماعیل گجر نے بتایا کہ ان کا تعلق سیاسی گھرانے سے ہے، ان کے خاندان نے مسلم لیگ نون اور گوجرانوالہ کی خدمت کی ہے۔ انہوں نے بتایا کہ ان کے خاندان میں سیاست کا آغاز ان کے تایا چوہدری نور عالم سے ہوا جو آزاد کشمیر میں ممبر اسمبلی اور وزیر بھی رہے۔ کاشف اسماعیل گجر نے کہا کہ ان کا خاندان انیس سو سینتالیس میں کشمیر سے ہجرت کر کے آیا تھا اور کشمیری مہاجرین کی سیاست سے ان کا گہرا تعلق ہے، پنجاب میں کشمیری مہاجرین کی بارہ نشستیں ہیں۔ انہوں نے بتایا کہ ان کے والد کشمیر کی سیاست میں چار بار ممبر اسمبلی بنے، وزیر جیل خانہ جات اور وزیر صحت کے عہدوں پر بھی رہے اور کشمیر میں جیلوں اور صحت کے شعبے میں کام کیا۔ کاشف اسماعیل گجر نے بتایا کہ انہوں نے انیس سو چھیانوے میں اپنے تایا کے انتقال کے بعد عملی سیاست کا آغاز کیا۔ گوجرانوالہ کی سیاست کے حوالے سے انہوں نے کہا کہ مسلم لیگ نون گوجرانوالہ میں کلین سویپ کرے گی، گوجرانوالہ کے لوگ نواز شریف اور شہباز شریف سے پیار کرتے ہیں۔ انہوں نے کہا کہ مسلم لیگ نون نے گوجرانوالہ میں بہت ترقیاتی کام کیے ہیں، شہر کو پکا کر دیا گیا ہے، گوجرانوالہ اب پیرس بن گیا ہے اور فلائی اوور دسمبر تک مکمل کر لیا جائے گا۔ انہوں نے کہا کہ لوڈ شیڈنگ کو نہ ہونے کے برابر کر دیا گیا ہے اور دو ہزار اٹھارہ میں لوڈ شیڈنگ مکمل طور پر ختم کر دی جائے گی۔ گوجرانوالہ میں کارڈیالوجی اسپتال بھی کام کر رہا ہے۔ انہوں نے کہا کہ نوجوان نسل میں سیاست کا جوش ہے اور گوجرانوالہ کے نوجوان آگے آ کر ملک کی خدمت کرنا چاہتے ہیں۔ آخر میں انہوں نے اوورسیز پاکستانیوں کو پیغام دیا کہ وہ پاکستان میں سرمایہ کاری کریں اور ملک کی ترقی میں اپنا کردار ادا کریں۔
رپورٹ: شاہد گھمن، نمائندہ 92 نیوز
Shahid Ghumman, Correspondent 92 News