سیاسی جماعتیں اپنے سیاسی منڈیٹ کے اندر رہ کر جلسوں میں بیان بازی کریں، ڈاکٹر جمعہ خان مری

اوورسیز پاکستان بلوچ یونٹی کے چیئرمین ڈاکٹر جمعہ خان مری نے کہا ہے کہ سیاسی جماعتوں کو چاہیے کہ وہ اپنے جلسے جلوس میں کوئی ایسا غیر ذمہ دارانہ بیان نہ دیں جس سے ہمارے ملک کے دشمنوں کے بیانیے کو تقویت ملے۔ کیونکہ ایسے غیر ذمہ دارانہ بیانات کے دور رس نتائج ہوتے ہیں۔ سیاسی جماعتیں اپنے سیاسی مینڈیٹ کے اندر رہ کر اپنے جلسوں میں بیان بازی کریں۔ ماسکو میں اپنے ویڈیو بیان میں ڈاکٹر جمعہ خان مری نے کوئٹہ بم دھماکے کی شدید الفاظ میں مذمت کی اور قیمتی جانوں کے نقصان پر دکھ کا اظہار کیا۔ انہوں نے کہا کہ بلوچستان میں سیکیورٹی کی صورتحال کافی بہتر ہو گئی ہے اور اس طرح کی کارروائیاں بھی ہماری سیکیورٹی فورسز کنٹرول کر لیں گی۔ دہشت گردی کے خطرے کے باوجود بھی حکومت نے پی ڈی ایم کے جلسے کو فول پروف سیکیورٹی فراہم کی ہے اور لوگوں کی جان و مال کی حفاظت فورسز کی اپنی ذمہ داری ہے۔ انہوں نے تمام قانون نافذ کرنے والے اداروں کو مبارکباد پیش کی۔ ان کا کہنا تھا کہ ہمارے دشمن ہمیں ہر بہانے سے نشانہ بناتے ہیں، ہم اپنے سیاسی جلسے جلوسوں میں کوئی ایسا غیر ذمہ دارانہ بیان نہ دیں جس سے ہمارے ملک کے دشمنوں کے بیانات کو تقویت ملے۔ کسی بھی غیر سنجیدہ بیان کے عالمی سطح پر پاکستان پر منفی اثرات مرتب ہوتے ہیں۔

رپورٹ: شاہد گھمن، نمائندہ 92 نیوز
Shahid Ghumman, Correspondent 92 News