سفیر شفقت علی خان کا شاہد گھمن کے ساتھ خصوصی انٹرویو، سفارتخانہ پاکستان ماسکو

روس میں تعینات پاکستانی سفیر شفقت علی خان کہتے ہیں کہ پاکستان اور روس کے سیاسی، سفارتی، معاشی اور دیگر شعبوں میں اچھے اور مضبوط تعلقات بنانا ان کی اولین ترجیح ہوگی۔ پاکستانی سفارت خانہ ہمہ وقت ہم وطنوں کی خدمت کے لیے حاضر ہے۔ ماسکو میں 92 نیوز سے گفتگو کرتے ہوئے انہوں نے کہا کہ روس کا کرونا وائرس سے نمٹنے کا نظام کافی مضبوط ہے، اسپتال اور لیبارٹریز موجود ہیں اور حکومت اس پر قابو پانے کی صلاحیت رکھتی ہے۔ ان کا کہنا تھا کہ روس دنیا سے کٹا ہوا نہیں ہے، یہ مسئلہ پوری دنیا کا ہے اور روس نے شروع میں ہی اس پر قابو پانے کے لیے تیز رفتار اقدامات کیے، لاک ڈاؤن کا اعلان کیا گیا اور اسے تیس اپریل تک بڑھا دیا گیا ہے۔ انہوں نے کہا کہ روس میں لاک ڈاؤن کرفیو نہیں ہے، غیر ملکی روسی اسٹورز جا سکتے ہیں اور دوکانیں کھلی ہیں۔ پاکستانیوں کے مسائل کے حوالے سے انہوں نے کہا کہ روس میں رہنے والے پاکستانیوں سے سفارت خانہ رابطے میں ہے اور انہیں حکومت کی ہدایات اور سماجی فاصلے پر عمل کرنے کی تاکید کی گئی ہے۔ جن طلبہ کے ویزوں کی مدت ختم ہو گئی ہے، ان کے حوالے سے بھی سفارت خانہ رابطے میں ہے اور روسی حکومت نے کہا ہے کہ وہ اپنے ہاسٹلز میں رہ سکتے ہیں۔ جو پاکستانی کاروبار یا ملاقات کے لیے آئے تھے اور ان کے ویزے ختم ہو گئے، ان کے مسائل بھی سفارت خانے کے علم میں ہیں۔ جن پاکستانیوں کے کاروبار بند ہو گئے اور وہ گھروں میں پھنس گئے، سفارت خانے نے ان سے رابطہ کیا اور جنہوں نے سفارت خانے سے رابطہ کیا انہیں راشن اور دیگر مدد پہنچائی گئی۔ ابھی تک ایک سو بائیس پاکستانیوں کی درخواستیں موصول ہوئی ہیں، سب سے زیادہ تعداد، نوے کے قریب، سینٹ پیٹرزبرگ میں ہے۔ سفیر نے کہا کہ روس کے ساتھ تعلقات کو ترقی دینا پاکستان کی خارجہ پالیسی کی اولین ترجیح ہے۔ انہوں نے کہا کہ سفارت خانہ آپ کا اپنا گھر ہے، کوئی مشکل پیش ہو تو بے فکر ہو کر ہم سے رابطہ کریں۔ انہوں نے خوشی کا اظہار کیا کہ روسی حکومت کی طرف سے کوئی شکایت نہیں آئی کہ کسی پاکستانی نے قانون توڑا ہو، اور پاکستانی کمیونٹی کے افراد ایک دوسرے کی مدد کر رہے ہیں۔
رپورٹ: شاہد گھمن، نمائندہ 92 نیوز
Shahid Ghumman, Correspondent 92 News