پاکستان کمیونٹی سینٹ پیٹرزبرگ کے صدر ڈاکٹر فاروق احمد خان ہوتی اور ڈاکٹر سیدغفران شاہ کا خصوصی انٹرویو

سینٹ پیٹرزبرگ میں پاکستان کمیونٹی سینٹ پیٹرزبرگ روس کے روح رواں ڈاکٹر فاروق احمد خان ہوتی اور ڈاکٹر سید غفران شاہ کا خصوصی انٹرویو، میزبان شاہد گھمن۔ گفتگو سینٹ پیٹرزبرگ کے ممتاز بزنس مین مدثر کی سرپرستی میں چلنے والے ایک کیفے میں ہوئی جہاں رمضان میں پاکستانی کمیونٹی کے افطار ڈنر بھی ہوتے رہے ہیں۔ ڈاکٹر ہوتی نے بتایا کہ وہ 2007 سے پاکستانی کمیونٹی کی قیادت کر رہے ہیں اور کمیونٹی کے مسائل میں صحت اور دستاویزات سب سے اہم ہیں، بہت سے پاکستانی قانونی بنیاد پر نہیں ہیں اس لیے ان کی صحت کا مسئلہ بہت ہوتا ہے، روس میں انشورنس والے ہر شخص کا علاج مفت ہوتا ہے لیکن یہ لڑکے دستاویزات کو نہیں سمجھتے اور بغیر انشورنس کے کام کرتے ہیں، ڈاکٹر ہوتی ذاتی طور پر ان کی انشورنس کرواتے ہیں۔ ڈاکٹر غفران نے بتایا کہ سب سے زیادہ مسائل ان نوجوانوں کے ہیں جو مزدوری کے لیے پاکستان سے آئے ہیں، انہیں روسی زبان نہیں آتی اس لیے اچھی نوکری نہیں مل سکتی اور وہ منڈیوں میں دیہاڑی دار مزدوری کرتے ہیں، تنخواہ تھوڑی ہوتی ہے اور سردیوں میں وہ جلدی بیمار ہو جاتے ہیں۔ مہمانوں نے پاکستان سے آنے والوں کو مشورہ دیا کہ روس میں کاروبار کے بہت مواقع ہیں لیکن یورپ کے برعکس یہاں انگریزی سے کام نہیں چلتا، روسی زبان ضروری ہے، نوکری آسانی سے نہیں ملتی اس لیے کاروبار ہی راستہ ہے، سینٹ پیٹرزبرگ میں مدثر سمیت کئی پاکستانی کامیاب کاروبار کر رہے ہیں، ان کی دکانیں اور کیفے ہیں۔ تجارت کے شعبے میں صرف پانچ چھے لوگ کام کر رہے ہیں جبکہ پاکستان سے کپڑے اور سبزیاں آ رہی ہیں اور یہاں سے اسٹیل اور ٹیکنالوجی پاکستان جا سکتی ہے، ہم اتنی بڑی مارکیٹ سے فائدہ نہیں اٹھا رہے ہیں۔ مہمانوں نے کہا کہ سینٹ پیٹرزبرگ میں پاکستانی قونصل خانے کا چھوٹا سا دفتر بھی بہت ضروری ہے کیونکہ پاسپورٹ کی تجدید کے لیے ماسکو جانا پڑتا ہے جس میں دو تین دن لگ جاتے ہیں اور ہوٹل، کھانا اور سفر کا کافی خرچہ ہوتا ہے، کمیونٹی اس دفتر کا خرچہ برداشت کرنے کو تیار ہے۔ مہمانوں نے خبردار کیا کہ روس سے یورپ جانے کا راستہ ایک غلط امید ہے، روس کی سرحدیں مکمل طور پر بند ہیں، کئی پاکستانی اس دھوکے میں آ کر ڈیپورٹیشن سینٹر میں بیٹھے ہیں، ایجنٹوں نے ان سے پیسے لے کر انہیں دھوکا دیا اور پولیس انہیں پکڑ کر جیل بھیج دیتی ہے۔ ڈاکٹر ہوتی نے بتایا کہ 1970 میں روس اور پاکستان کے درمیان ایک معاہدہ ہوا تھا جس کے تحت پاکستانی ڈگریاں روس میں قبول ہیں، اس لیے پڑھے لکھے پاکستانی ڈاکٹر اور انجینئر یہاں آ کر سرکاری نوکریاں بھی کر سکتے ہیں۔
رپورٹ: شاہد گھمن، نمائندہ 92 نیوز
Shahid Ghumman, Correspondent 92 News