ماسکو میں میڈ اِن رشیا انٹرنیشنل ایکسپورٹ فورم میں پاکستانی تجارتی وفد کی بھرپور شرکت
ماسکو میں جاری میڈ اِن رشیا انٹرنیشنل ایکسپورٹ فورم میں پاکستانی تجارتی وفد نے بھرپور شرکت کی ہے۔ فورم کے دوران ماسکو اور گلوبل ساؤتھ کے درمیان تجارتی تعاون کے موضوع پر خصوصی پینل ڈسکشن منعقد ہوئی، جس میں سفیر پاکستان فیصل نیاز ترمذی، فیڈریشن آف پاکستان چیمبرز آف کامرس اینڈ انڈسٹری کے سینئر نائب صدر ساقب فیاض اور پاکستانی تجارتی وفد نے شرکت کی۔
سفیر پاکستان نے خطاب کرتے ہوئے کہا کہ وزیراعظم شہباز شریف رواں ماہ کے آخر میں روس کا سرکاری دورہ کریں گے۔ انہوں نے کہا کہ وزیراعظم چاہتے ہیں کہ یہ دورہ صرف ملاقاتوں اور مفاہمتی یادداشتوں تک محدود نہ رہے، بلکہ دونوں ممالک کی کمپنیاں تجارت، ثقافت اور تعلیم کے شعبوں میں عملی تعاون بڑھائیں۔ سفیر پاکستان نے بتایا کہ دونوں ممالک کے درمیان آزاد تجارتی معاہدے کے لیے بات چیت شروع ہو چکی ہے۔
انہوں نے کہا کہ انفارمیشن ٹیکنالوجی، ادویہ سازی، جراحی آلات، کھیلوں کی مصنوعات اور ٹرانسپورٹ کے شعبوں میں تعاون بڑھانے پر زور دیا جا رہا ہے۔ پینل ڈسکشن کے دوران سفیر پاکستان نے کہا کہ ویزوں، ادائیگیوں کے طریقہ کار اور لاجسٹکس کے مسائل کی نشاندہی کی جا چکی ہے، ادائیگیوں کے نظام پر اعلیٰ سطح پر مذاکرات جاری ہیں اور ممکن ہے کہ اگلے دو ہفتوں میں اہم پیش رفت سامنے آ جائے۔
فورم کے موقع پر سفیر پاکستان نے دنیا نیوز سے گفتگو میں پاکستان اور روس کے درمیان تجارتی اور اقتصادی تعاون سے متعلق اپنے خیالات کا اظہار کیا۔ انہوں نے کہا کہ وزیراعظم شہباز شریف کے متوقع دورۂ روس سے قبل دونوں ممالک کے درمیان بینکاری، تجارتی ادائیگیوں اور لاجسٹکس کے مسائل حل کرنے کی کوششیں جاری ہیں۔
پاکستانی تجارتی وفد کے ارکان نے بھی دنیا نیوز سے خصوصی گفتگو کرتے ہوئے فورم میں شرکت اور پاکستان اور روس کے درمیان تجارتی تعاون کے حوالے سے اپنے خیالات کا اظہار کیا۔ وفد کے ارکان کا کہنا تھا کہ پاکستان سے آئی ٹی کا ایک بڑا وفد پہلی بار روس آیا ہے اور روس میں تعاون کے بہت مواقع موجود ہیں۔ ان کا کہنا تھا کہ دونوں ممالک آئی ٹی سمیت مختلف شعبوں میں مشترکہ منصوبوں کے ذریعے دنیا بھر میں اور ایک دوسرے کے ممالک میں مل کر کام کر سکتے ہیں۔
فورم میں روس کی جدید ٹیکنالوجی کی مصنوعات بھی پیش کی گئیں، جن میں جدید فضائی گاڑیاں، ویڈیو اینالٹکس اور سیکیورٹی سسٹم شامل ہیں۔
سفیر پاکستان کے مطابق پاکستانی تجارتی وفد کی میڈ اِن رشیا فورم میں شرکت دونوں ممالک کے درمیان اقتصادی اور تجارتی تعاون کے فروغ کے لیے ایک اہم قدم ہے، اور بینکاری، تجارتی ادائیگیوں اور ٹرانسپورٹ کے مسائل حل کرنے کے لیے اعلیٰ سطح پر مذاکرات جاری ہیں۔
رپورٹ: شاہد گھمن، نمائندہ دنیا نیوز روس
Shahid Ghumman, Correspondent Dunya News Russia

شاہد گھمن پاکستان کے سینئر صحافی، تجزیہ کار، کالم نگار اور بین الاقوامی امور کے ماہر ہیں۔ وہ اس وقت پاکستان کے صفِ اول کے نیوز چینل دنیا نیوز کے نمائندہ برائے روس کی حیثیت سے ماسکو میں خدمات انجام دے رہے ہیں اور اردو نیوز پلیٹ فارم وائس آف رشیا کے ایڈیٹر بھی ہیں۔
انہوں نے 1996ء میں اپنے صحافتی سفر کا آغاز کیا اور پاکستان کے مختلف معتبر اخبارات، خبر رساں اداروں اور ٹیلی وژن چینلز کے ساتھ کام کیا۔ شاہد گھمن نے 2017ء سے فروری 2025ء تک 92 نیوز کے نمائندہ برائے روس کی حیثیت سے خدمات انجام دیں، جبکہ فروری 2025ء سے وہ دنیا نیوز کے لیے روس سے رپورٹنگ کر رہے ہیں۔
شاہد گھمن 2018ء سے روسی وزارتِ خارجہ کے ساتھ باقاعدہ ایکریڈیٹڈ غیر ملکی صحافی ہیں۔ روس کی داخلی و خارجہ سیاست، پاکستان اور روس کے تعلقات، وسطی ایشیا، بین الاقوامی سفارت کاری، دفاع، توانائی اور جغرافیائی سیاست ان کی صحافتی دلچسپی اور تخصص کے اہم شعبے ہیں۔
وہ اپنی رپورٹس، کالموں، خصوصی انٹرویوز اور تجزیوں میں درست معلومات، حقائق پر مبنی تحقیق اور متوازن نقطۂ نظر کو بنیادی اہمیت دیتے ہیں۔
Shahid Ghumman is a senior Pakistani journalist, analyst, columnist and international affairs specialist. He is currently based in Moscow, serving as the Russia Correspondent for Dunya News, one of Pakistan’s leading news channels. He is also the Editor of the Urdu-language news platform Voice of Russia.
He began his journalistic career in 1996 and has worked with several respected Pakistani newspapers, news organizations and television channels. He served as the Russia Correspondent for 92 News from 2017 until February 2025 and has been reporting from Russia for Dunya News since February 2025.
Shahid Ghumman has been officially accredited as a foreign correspondent by the Ministry of Foreign Affairs of the Russian Federation since 2018. His principal areas of coverage include Russia’s domestic and foreign policy, Pakistan-Russia relations, Central Asia, international diplomacy, defence, energy and geopolitics.
Through his reports, columns, exclusive interviews and analyses, he remains committed to accurate information, fact-based research and balanced journalism.
