سفارتخانہ پاکستان ماسکو کے زیر اہتمام عید ملن پارٹی کا اہتمام، رپورٹ شاہد گھمن دنیا نیوز

سفارت خانہ پاکستان ماسکو میں سفیر پاکستان محمد خالد جمالی کی جانب سے عید ملن پارٹی کا اہتمام کیا گیا جس میں پاکستانی کمیونٹی کی اہم شخصیات سمیت خواتین اور بچوں نے کثیر تعداد میں شرکت کی۔ عید ملن پارٹی میں پاکستان کے ملی نغمے پیش کیے گئے اور عید کا کیک بھی کاٹا گیا۔ عید ملن پارٹی کے مہمان خصوصی ماسکو کی ممتاز کاروباری شخصیت ڈاکٹر طارق چوہدری تھے۔ عید ملن پارٹی میں پاکستان کمیونٹی روس کے صدر ملک شہباز اور ڈاکٹر بابر اسلام سمیت کمیونٹی کی کثیر تعداد نے شرکت کی۔ عید ملن پارٹی میں پاکستان کے ملی نغمے پیش کیے گئے اور محمود بھٹی نے “اے وطن پیارے وطن” ملی نغمہ پیش کر کے تقریب کو چار چاند لگا دیے۔ اس کے بعد محمود بھٹی کے بیٹے دانیل نے بانسری کی دھنیں پیش کیں۔ عید ملن پارٹی کی تقریب میں سفیر پاکستان محمد خالد جمالی نے ڈاکٹر طارق چوہدری، دفاعی اتاشی محمد آصف خان، ملک شہباز اور دیگر مہمانوں کے ساتھ مل کر پاکستانی بچوں میں عیدی تقسیم کی۔ سفیر پاکستان نے کہا کہ سب سے پہلے اپنی طرف سے اور سفارت خانے کی طرف سے روس میں بسنے والے تمام پاکستانیوں کو عید مبارک کا پیغام پہنچانا چاہتا ہوں اور آج کے دن ہمیں اپنے مسلمان بھائیوں کو خاص طور پر جو فلسطین میں غزہ میں ہیں اور جو جموں و کشمیر میں ہیں ان کو بھی یاد رکھنا چاہیے اور ان کو بھی آپ کے توسط سے عید مبارک پیش کرتا ہوں۔ تقریب میں شریک ایک رکن کا کہنا تھا کہ سفارت خانے میں عید الفطر کا پروگرام منعقد کیا گیا جس میں بہت سے کھانے بنائے گئے اور بالکل گھر جیسی فیلنگ تھی۔ انہوں نے کہا کہ ہر سال یہ پروگرام منعقد کیا جاتا ہے اور ہر دفعہ اس میں کوئی نئی چیز ہوتی ہے اور اس بار بہت سے طلبہ بھی آئے تھے جنہوں نے پروگرام میں حصہ لیا اور کھانا بہت اچھا تھا۔ انہوں نے کہا کہ سب کو یہاں مل بیٹھ کر عید گزارنے کا موقع مل گیا ہے اور پردیس میں یہ ایک بہت بڑا تہوار محسوس ہو رہا ہے اور سب بہت انجوائے کر رہے ہیں۔ ایک اور شریک کا کہنا تھا کہ سفارت خانہ پاکستان ماسکو میں عید کا پروگرام بہت زبردست رہا اور بچوں کو عیدی ملی اور پاکستانی کھانوں سے مہمانوں نے لطف اٹھایا اور پاکستانی نغموں اور ثقافت کو سراہا۔ انہوں نے کہا کہ آج اس تقریب نے روس میں رہنے والی پاکستانی کمیونٹی کے لیے چار چاند لگا دیے ہیں اور آج موسم بھی اچھا ہے اور سب کی خوشیاں دوبالا ہو گئی ہیں۔ آخر میں سفیر پاکستان محمد خالد جمالی نے حاضرین کا شکریہ ادا کیا اور عید کی مبارک باد پیش کی۔

رپورٹ: شاہد گھمن، نمائندہ دنیا نیوز روس
Shahid Ghumman, Correspondent Dunya News Russia