پاکستان کے معروف اداکار مانی بھی فٹبال ورلڈ کپ دیکھنے روس پہنچ گئے

اس وقت فیفا ورلڈ کپ دو ہزار اٹھارہ کا جنون پوری دنیا میں سر چڑھ کر بول رہا ہے۔ جہاں دنیا بھر کے شائقین فٹبال کے لیے روس آ رہے ہیں وہیں پاکستان کے معروف اداکار مانی بھی فٹبال ورلڈ کپ دیکھنے کے لیے روس پہنچ چکے ہیں۔ اگرچہ فیفا ورلڈ کپ میں پاکستان کی ٹیم شامل نہیں لیکن پاکستانی شائقین اپنی پسندیدہ ٹیم کو سپورٹ کرنے کے لیے روس آ رہے ہیں۔ کچھ ایسا ہی پاکستان کے معروف اداکار مانی نے بھی کیا ہے جو فٹبال مقابلے سے لطف اندوز ہونے کے لیے روس کے شہر سینٹ پیٹرزبرگ پہنچ گئے ہیں جہاں وہ فٹبال مقابلے سے لطف اندوز ہوئے وہیں وہ اس شہر کی خوبصورتی کے گرویدہ بھی ہو گئے۔ اداکار مانی نے 92 نیوز سے گفتگو کرتے ہوئے کہا کہ وہ روس میں پاکستان اور پاکستانیوں کو متعارف کروانے میں کردار ادا کر رہے ہیں۔ ان کا کہنا تھا کہ روس کے شہریوں کی طرف سے بھی انہیں بے پناہ محبت مل رہی ہے۔ مانی نے کہا کہ روس میں مقیم پاکستانیوں نے جس طرح انہیں عزت اور محبت دی اس کو وہ کبھی فراموش نہیں کر سکتے۔

رپورٹ: شاہد گھمن، نمائندہ 92 نیوز
Shahid Ghumman, Correspondent 92 News